Bus-satand Par

KHudaya ab ke ye kaisi bahaar aai

KHuda se kya gila bhai

KHuda to KHair kis ne us ka aks-e-naqsh-e-pa dekha

na dekha to bhi dekha aur dekha bhi to kya dekha

magar tauba meri tauba ye insan bhi to aaKHir ek tamasha hai

ye jis ne pichhli Tangon par khaDa hona baDe jatanon se sikha hai

abhi kal tak jab us ke abruon tak mu-e-pechan the

abhi kal tak jab us ke honT mahrum-e-zanaKHdan the

rida-e-sad-zaman oDhe larazta kanpta baiTha

zamir-e-sang se bas ek chingari ka talib tha

magar ab to ye unchi mamTiyon wale jilau-KHanon mein basta hai

hamare hi labon se muskurahaT chhin kar ab hum pe hansta hai

KHuda us ka KHudai us ki har shai us ki hum kya hain

chamakti motoron se uDne wali dhul ka nachiz zarra hain

hamari hi tarah jo paemal-e-satwat-e-amiri-o-shahi mein

likhokha aabdida pa-piyaada dil-zada wamanda rahi hain

jinhen nazron se gum hote hue raston ki gum-paima lakiron mein

dikhai de rahi hain aane wali manzilon ki dhundli taswiren

zarur ek roz badlega nizam-e-qismat-e-adam

basegi ek nai duniya sajega ek naya aalam

shabistan mein nai shamen gulistan mein naya mausam

wo rut ai ham-nafas jaane kab aaegi

wo fasl-e-der-ras jaane kab aaegi

ye nau number ki bas jaane kab aaegi