Aa Nikal Ke Maidan Mein Do-ruKHi Ke KHane Se

aa nikal ke maidan mein do-ruKHi ke KHane se

kaam chal nahin sakta ab kisi bahane se

ahd-e-inqalab aaya daur-e-aftab aaya

muntazir thin ye aankhen jis ki ek zamane se

ab zamin gaegi hal ke saz par naghme

wadiyon mein nachenge har taraf tarane se

ahl-e-dil ugaenge KHak se mah o anjum

ab guhar subuk hoga jau ke ek dane se

manchale bunenge ab rang-o-bu ke pairahan

ab sanwar ke niklega husn kar-KHane se

aam hoga ab hamdam sab pe faiz fitrat ka

bhar sakenge ab daman hum bhi is KHazane se

main ki ek mehnat-kash main ki tirgi-dushman

subh-e-nau ibarat hai mere muskurane se

KHud-kushi hi ras aai dekh bad-nasibon ko!

KHud se bhi gurezan hain bhag kar zamane se

ab junun pe wo saat aa paDi ki ai 'majruh'

aaj zaKHm-e-sar behtar dil pe choT khane se