Ye Jo Chupke Se Aae BaiThe Hain

ye jo chupke se aae baiThe hain

lakh fitne uThae baiThe hain

wo nahin hain to dard ko un ke

sine se hum lagae baiThe hain

ye bhi kuchh ji mein aa gai hogi

kya wo mere biThae baiThe hain

tazkira wasl ka nahin KHali

wo bhi kuchh lutf pae baiThe hain

mujh ko mara hai par KHajalat se

wo bhi gardan jhukae baiThe hain

rang jamta hai yan na aane ka

yani mehndi lagae baiThe hain

mujh ko mahfil mein dekh kar bole

aap yan kyun ki aae baiThe hain

KHair ho hain bigaD ke aasar

kuchh wo munh ko banae baiThe hain

gham hamein kha raha hai to kya gham

hum bhi to gham ko khae baiThe hain

zad mein gar hai adu to ho wo to

ghat mujh par lagae baiThe hain

khoe jaane ka apne dhyan nahin

kuchh to aisa hi pae baiThe hain

sharm se hain wo lakh parde mein

go mere pas aae baiThe hain

shama san go ghule hi jate hain

us se par lau lagae baiThe hain

us gali mein basan-e-naqsh-e-qadam

hum bhi panw jamae baiThe hain

ho na ai shama husn par nazan

wo bhi mahfil mein aae baiThe hain

shoKHiyan KHud hain parda-dar un ki

kyun wo munh ko chhupae baiThe hain

fard-e-baatil samajh ke duniya ko

naqsh-e-hasti miTae baiThe hain

kya hai us KHush-KHiram ki aamad

fitne jo jae jae baiThe hain

tur jis aag ne jalaya tha

hum wo dil mein chhupae baiThe hain

chashmaken ghair se dikha denge

hum bhi aankhen laDae baiThe hain

kal taqaddus-maab masjid the

aaj rindon mein aae baiThe hain

la-ubaali KHiram hai 'majruh'

waza kaisi banae baiThe hain