Mahw-e-ruKH-e-yar Ho Gae Hum
mahw-e-ruKH-e-yar ho gae hum
so ji se nisar ho gae hum
fitrak se bandh KHwah mat bandh
ab tere shikar ho gae hum
daman ko na pahunche tere ab tak
har chand ghubar ho gae hum
aata nahin koi ab nazar mein
kis se ye do-chaar ho gae hum
tha kaun ki dekhte hi jis ke
yun aashiq-e-zar ho gae hum
hasti hi hijab thi jo dekha
is bahar se par ho gae hum
'bedar' sarishk-e-lala-gun se
ham-chashm-e-bahaar ho gae hum
Meer Mohammadi Bedar 
(282) Peoples Rate This