Pawe Kis Tarah Koi Kis Ko Hai Maqdur Hamein

pawe kis tarah koi kis ko hai maqdur hamein

le gaya ishq tera khinch bahut dur hamein

subh ki raat to ro ro ke ab aa ai be-mehr

roz-e-raushan ko dikha mat shab-e-dijur hamein

rabt ko chahiye yak naua ki jinsiyyat yan

chashm-e-bimar use hai dil-e-ranjur hamein

baat gar kije to hai banda-nawazi warna

dekhna hi hai faqat aap ka manzur hamein

ulfat us shoKH ki chhuTe hai koi jite-ji

rakkho is pand se ai naseho mazur hamein

pi hai mai raat ko ya jage ho tum kuchh to hai

aankhen aati hain nazar aaj to maKHmur hamein

yan se 'bedar' gaya wo mah-e-taban shayad

nazar aata hai ye ghar aaj to be-nur hamein