Tere KHamosh Takallum Ka Sahaara Ho Jaun
tere KHamosh takallum ka sahaara ho jaun
tera andaz badal dun tera lahja ho jaun
tu mere lams ki tasir se waqif hi nahin
tujh ko chhu lun to tere jism ka hissa ho jaun
tere honTon ke liye honT mere aab-e-hayat
aur koi jo chhue zahr ka pyala ho jaun
kar diya tere taghaful ne adhura mujh ko
ek hichki agar aa jae to pura ho jaun
dil ye karta hai ki is umr ki pagDanDi par
ulTe pairon se chalun phir wahi laDka ho jaun
apni takmil ka kuchh zaiqa tabdil karun
tujh se bichhDun main zara der adhura ho jaun
dil ki sohbat mujhe har waqt jawan rakhti hai
aql ke sath chala jaun to buDDha ho jaun
is qadar chiKHti rahti hai KHamoshi mujh mein
shor kanon mein utar jae to bahra ho jaun
tere chaDhte hue dariya ko pasheman kar dun
tujh ko pane ke liye ret ka sahra ho jaun
aap hasti ko tere shauq pe qurban karun
tu agar toD ke KHush ho to khilauna ho jaun
Mehshar Afridi 
(2107) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544