Phul ZaKHmi Hain Khaar ZaKHmi Hai

phul zaKHmi hain KHar zaKHmi hai

ab ke sari bahaar zaKHmi hai

meri aankhon se KHun bahta hai

kis qadar intizar zaKHmi hai

meri gardan to kaT di hai magar

KHud bhi wo zul-fiqar zaKHmi hai

teri haiwaniyat pe a insan

nazm-e-lail-o-nahaar zaKHmi hai

husn ne aisi zarb mari hai

ab talak mera pyar zaKHmi hai

teri nusrat ko aa nahin sakta

tera ye jaan-nisar zaKHmi hai

ab kisi par yaqin nahin hai mujhe

is qadar eatibar zaKHmi hai