Aa Jaen Hum Nazar Jo Koi Dam Bahut Hai Yan

aa jaen hum nazar jo koi dam bahut hai yan

mohlat hamein bisan-e-sharar kam bahut hai yan

yak lahza sina-kubi se fursat hamein nahin

yani ki dil ke jaane ka matam bahut hai yan

hasil hai kya soe tarai ke dahr mein

uTh aasman tale se ki shabnam bahut hai yan

mail ba-ghair hona tujh abru ka aib hai

thi zor ye kaman wale KHam cham bahut hai yan

hum rah-rawan-e-rah-e-fana der rah chuke

waqfa bisan-e-subh koi dam bahut hai yan

us but-kade mein mani ka kis se karen sawal

aadam nahin hai surat-e-adam bahut hai yan

aalam mein log milne ki gon ab nahin rahe

har-chand aisa-waisa to aalam bahut hai yan

waisa chaman se sada nikalta nahin koi

rangini ek or KHam-o-cham bahut hai yan

ejaz-e-iswi se nahin bahs ishq mein

teri hi baat jaan-e-mujassam bahut hai yan

mere halak karne ka gham hai abas tumhein

tum shad zindagani karo gham bahut hai yan

dil mat laga ruKH-e-araq-alud yar se

aaine ko uTha ki zamin nam bahut hai yan

shayad ki kaam subh tak apna khinche na 'mir'

ahwal aaj sham se dirham bahut hai yan