Diya Hai Dil Agar Usko Bashar Hai Kya Kahiye

diya hai dil agar us ko bashar hai kya kahiye

hua raqib to ho nama-bar hai kya kahiye

ye zid ki aaj na aawe aur aae bin na rahe

qaza se shikwa hamein kis qadar hai kya kahiye

rahe hai yun gah-o-be-gah ki ku-e-dost ko ab

agar na kahiye ki dushman ka ghar hai kya kahiye

zahe karishma ki yun de rakkha hai hum ko fareb

ki bin kahe hain unhen sab KHabar hai kya kahiye

samajh ke karte hain bazar mein wo pursish-e-haal

ki ye kahe ki sar-e-rahguzar hai kya kahiye

tumhein nahin hai sar-e-rishta-e-wafa ka KHayal

hamare hath mein kuchh hai magar hai kya kahiye

unhen sawal pe zom-e-junun hai kyun laDiye

hamein jawab se qat-e-nazar hai kya kahiye

hasad saza-e-kamal-e-suKHan hai kya kijiye

sitam baha-e-mata-e-hunar hai kya kahiye

kaha hai kis ne ki 'ghaalib' bura nahin lekin

siwae is ke ki aashufta-sar hai kya kahiye