Husn Ghamze Ki Kashakash Se ChhuTa Mere Baad

husn ghamze ki kashakash se chhuTa mere baad

bare aaram se hain ahl-e-jafa mere baad

mansab-e-sheftagi ke koi qabil na raha

hui mazuli-e-andaz-o-ada mere baad

shama bujhti hai to us mein se dhuan uThta hai

shoala-e-ishq siyah-posh hua mere baad

KHun hai dil KHak mein ahwal-e-butan par yani

un ke naKHun hue mohataj-e-hina mere baad

dar-KHur-e-arz nahin jauhar-e-bedad ko ja

nigah-e-naz hai surme se KHafa mere baad

hai junun ahl-e-junun ke liye aaghosh-e-widaa

chaak hota hai gareban se juda mere baad

kaun hota hai harif-e-mai-e-mard-afgan-e-ishq

hai mukarrar lab-e-saqi pe sala mere baad

gham se marta hun ki itna nahin duniya mein koi

ki kare taziyat-e-mehr-o-wafa mere baad

aae hai bekasi-e-ishq pe rona 'ghaalib'

kis ke ghar jaega sailab-e-bala mere baad

thi nigah meri nihan-KHana-e-dil ki naqqab

be-KHatar jite hain arbab-e-riya mere baad

tha main guldasta-e-ahbab ki bandish ki giyah

mutafarriq hue mere rufaqa mere baad