Raushni Kuchh To Mile Jangal Mein
raushni kuchh to mile jangal mein
aag lag jae ghane jangal mein
aap ko shahar mein Dar lagta hai
hum to be-KHauf rahe jangal mein
ek ek shaKH zaban ho jae
koi aawaz to de jangal mein
peD se peD laga rahta hai
pyar hota hai bhare jangal mein
shahar mein kan taraste hi rahe
chahchahe hum ne sune jangal mein
sham hote hi utar aate hain
shoKH pariyon ke pare jangal mein
shoKH hirnon ne qulanchen marin
mor ke raqs hue jangal mein
ab bhi qadmon ke nishan milte hain
ganw se dur pare jangal mein
ab bhi phirti hai koi parchhain
raat ke waqt bhare jangal mein
KHub the hazrat-e-adam 'alwi'
bastiyan chhoD gae jangal mein
Mohammad Alvi 
(3003) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544