Koi Zari Suni Nahin Jati Koi Jurm Muaf Nahin Hota

koi zari suni nahin jati koi jurm muaf nahin hota

is dharti par is chhat ke tale koi tere KHilaf nahin hota

kabhi damken sone ke zarre kabhi jhalke murghabi ka lahu

kai pyase kab se khaDe hain magar pani shaffaf nahin hota

koi zulf aDe to bikhar jaana koi lab dahken to ThiThur jaana

kya tazkiya karte ho dil ka ye aaina saf nahin hota

kai mausam mujh par guzar gae ehram ke in do kapDon mein

kabhi patthar chum nahin sakta kabhi izn-e-tawaf nahin hota

yahan taj us ke sar par hoga jo taDke shahr mein daKHil ho

yahan saya huma ka nahin paDta yahan koh-qaf nahin hota