Wajud Par Inhisar Maine Nahin Kiya Tha

wajud par inhisar main ne nahin kiya tha

ki KHak ka e'tibar main ne nahin kiya tha

safed resham ki oDhni mere hath mein thi

magar use dagh-dar main ne nahin kiya tha

ye be-niyazi ki KHu mere husn mein bahut thi

magar use be-qarar main ne nahin kiya tha

mila tha KHorajin mein liye mera kasa-e-sar

magar use sharmsar main ne nahin kiya tha

kahin se yak-laKHt zindagi meri kaT dega

jo rasta iKHtiyar main ne nahin kiya tha

sumon-tale raund de KHushi se magar ye sun le

gunah ai shahsawar! main ne nahin kiya tha

dikhai dene laga wo ek tisra kinara

abhi jawani ko par main ne nahin kiya tha

ghurub ka waqt tha muqarrar so chal paDa main

kisi ka phir intizar main ne nahin kiya tha