Wo Hai Aag Wo Pani Hai
wo hai aag wo pani hai
sab ki ek kahani hai
un khanDaraat ke niche bhi
jari naql-e-makani hai
koi meri umr batae
bachpan hai ki jawani hai
aaine hain gard-alud
aur KHitta barani hai
ghar ka naqsha hai tayar
ab zanjir banani hai
hath hamare zaKHmi hain
aur chaTTan girani hai
koi sapna bhi dekho
virani virani hai
mere ghar ka sannaTa
meri hi be-dhyani hai
hijr ko hijr na kahna bhi
'mohsin' be-imani hai
Mohsin Asrar 
(444) Peoples Rate This