Mohabbat Mein Thani Aksar Yahan Tak

mohabbat mein Thani aksar yahan tak

ki pahunche marke tir o kaman tak

chale nawak khinchi zalim kaman tak

kahan tak imtihan aaKHir kahan tak

chale jate hain aawaz-e-jaras par

pahunch jaenge bichhDe karwan tak

hawa-e-shauq ke jhonke salamat

rahoge tum pas-e-parda kahan tak

na wo ayyar mujh se puchhta hai

na dil ki baat aati hai zaban tak

usi sar ko sar-e-shorida kahiye

jo pahunche us ke sang-e-astan tak

niyaz o naz ke charche rahenge

hamari aur tumhaari dastan tak

'mubarak' ko koi din aur sun lo

bayan ka lutf hai us KHush-bayan tak