Idrak

waqt dariya ki manind bahta rahega sada

jagmagate rahenge sitare

yunhi shab ki poshak mein

gul khilati rahegi hawa

ta-abad aab mein, KHak mein

istada rahenge KHayaban KHayaban

ye sarw-o-sanobar yunhi

sahilon par yunhi

langar-andaz honge jahaz

aur bachche yunhi sipiyan chunne

aate rahenge sada

yunhi mela rahega

zamane ke kuchon mein

bazar mein!

aur insan zinda rahega sada

ek paikar mein

ek zamane talak hum bhi sab ki tarah

yunhi socha kiye

yunhi samjha kiye

aur shab-o-roz ka be-nishan qafila

parda-e-ghaib mein

gum-shuda manzilon ki taraf

KHamushi se raha gamzan

zindagi mein achanak phir ek roz

ek hadsa ho gaya

jis ki shiddat se ek umr ka

sehar-e-fikr-o-nazar TuT bikhra

to aaKHir ye uqda khula

waqt dariya hai lekin ye KHud

ek samundar mein ja girta hai

us samundar ki jaanib hai

hasti ka sara safar

aankh ne aaj tak jitne manzar bhi dekhe

wo sab us ke

apne tarashida the

aur dil mein dhaDakta hua

tajrid-e-wahm-o-guman ke siwa kuchh nahin

aarzu-e-gham-e-agahi aisi arzan nahin

zist ke dusre raston ki tarah

rah-e-kar-e-junun itni aasan nahin

hai bulandi ki jaanib agar zindagi ka safar

phir to kuchh aur hain manzilen aadmi ke liye

jin ke har gam par, zindagi ke liye

hai sabaat-e-abad muntazir

aap-apni nafi ke amal se

guzarna paDega use

mahbas-e-ab-o-gil se

nikalna paDega use