Jam Lete Hain Na Pine Ko Subu Lete Hain

jam lete hain na pine ko subu lete hain

hum magar sarhad-e-idrak ko chhu lete hain

mai mayassar jo nahin pyas bujhane ke liye

hum to chalo main ab apna hi lahu lete hain

meri begana-rawi mujh ko bacha leti hai

intiqam apni taraf se to adu lete hain

toD dete hain use kis liye phir ahl-e-junun

mang kar KHud hi to zanjir-e-gulu lete hain

sirf aankhon ki tasalli ke liye hai ye sair

rang lete hain na hum phul se bu lete hain

TuT jae na kisi zaKHm ka Tanka ai dost

kaam hum zabt se hangam-e-rafu lete hain

kiya 'munawar' abhi baalidgi-e-shauq ka zikr

kis qadar waqt shajar bahr-e-numu lete hain