Le Ke Dil Kahte Ho Ulfat Kya Hai
le ke dil kahte ho ulfat kya hai
husn walo ye shararat kya hai
ek uchaTti si taghaful ki nigah
hila-e-arz-e-mohabbat kya hai
KHud hi nadim hun wafa par apni
us tabassum ki zarurat kya hai
mujh ko bohtan-e-hawas bhi manzur
kaun samjhega haqiqat kya hai
nikhat-o-nur ke sanson ka kaman
warna tu kya meri surat kya hai
qamat-e-yar ki bigDi hui shakl
fitna-e-roz-e-qayamat kya hai
kis ki himmat ki tujhe sath lagae
tu ba-juz mauj-e-latafat kya hai
rabt mahsus ki uljhan ke siwa
aap ka jazba-e-nafrat kya hai
ashk-e-gham bund hai pani ki magar
ye bhi malum hai qimat kya hai
daman-e-naz ki jhaDi hui gard
aur insan ki haqiqat kya hai
main ki ek gauhar-e-aluda-e-KHak
kuchh na samjha meri qimat kya hai
talib-e-dad-e-suKHan kyun ho 'nisar'
aap ke sher mein jiddat kya hai
Nisar Itavi 
(2248) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544