KHwab

kitne KHubsurat hote hain na

aur thoDe sar-phire bhi

ye chalna nahin chahte

bas uDna chahte hain

bharna chahte hain

ek aisi uDan

jahan zamin ki haqiqat ho

aur aasman ke par ki kalpana bhi

jahan waqt sa Thaharna ho

aur KHushbu sa bikharna bhi

ye sajna chahte hain

sanwarna chahte hain

KHud mein bharte hain rang

le kar titliyon se udhaar

chamak uThte hain

KHud ko chandni se sanwar

Tankte hain kuchh ujle sitare bhi

phir takte hain aaenge din hamare bhi

dekhte hain har nazar mein hazaron sawal

kahte hain KHud se na Dar tu sambhaal

din mein sajte hain shauq se

KHwahish ke bazaron mein

raaton mein bahte hain KHauf se

ashkon ke dhaaron mein

bahut KHush-nasib hoti hai wo aankhen

jin mein KHwab rahte hain

hain mukammal wo ashk bhi

jin mein KHwab bahte hain

(664) Peoples Rate This

Rashmi Bhardwaj's More Poetry

Your Thoughts and Comments

KHwab In English By Famous Poet Rashmi Bhardwaj. KHwab is written by Rashmi Bhardwaj. Read famous Poem KHwab for youth and Student by Rashmi Bhardwaj. Free Download KHwab in PDF.