Kisi Ke Nam Ko Likhte Hue MiTate Hue

kisi ke nam ko likhte hue miTate hue

tamam-raat kaTi KHud ko aazmate hue

kaha ye raat ne mujh se mujhe sulate hue

tu thak gai hai bahut haal-e-dil sunate hue

main kyun sameT nahin pati hun kabhi us ko

bikhar raha hai jo har-pal mujhe sajate hue

ye chahti thi ki main tai karun safar us ka

jo thak gaya hai mera hausla baDhate hue

zamana lakh use kosta rahe phir bhi

bahaar janma hamesha KHizan ne jate hue