Raja Rani Ki Kahani

aao bachcho suno kahani

ek tha raja ek thi rani

donon ek din shahr mein aae

shahr se ek ek guDiya lae

raja ki guDiya thi dubli

rani ki guDiya thi moTi

raja ki guDiya thi lambi

rani ki guDiya thi chhoTi

raja bola meri guDiya

meri guDiya baDi siyani

guDiyaon mein jaise rani

rani boli meri guDiya

meri guDiya ke kya kahne

achchhe achchhe gahne pahne

raja bola meri guDiya

meri guDiya bin bajae

miThe miThe gane gae

rani boli meri guDiya

meri guDiya nach dikhae

uchhle kude shor machae

donon mein bas hui laDai

donon ne ki hatha-pai

rani boli sun meri baat

meri guDiya ke do hat

ek se khae dal chapati

ek se khae sag aur pat

raja bola bas chup kar

meri guDiya ke do sar

jaise chiDiya ke do par

ek idhar aur ek udhar

rani boli hun hun hun

meri guDiya ke do mun

ek se khae garm pakauDe

ek se bole sun sun sun

itne mein ek baDhiya-mai

dauDi dauDi andar aai

aate hi ek DanT pilai

kya hai jhagDa kya hai laDai

ye bhi guDiya wo bhi guDiya

ye bhi siyani wo bhi siyani

tu hai raja tu hai rani

KHatm karo ye ram-kahani