Nazm

mere KHayal mein wo aurat

duniya ki laziz-tarin aurat hai

main us ke andar gharq ho jaunga

wo mujhe dur dur se

apna aap dikhati hai

mere andar bhuk aur pyas ko bedar karti hai

aur jab main KHwahish ki aag mein jalne lagta hun

wo itminan se hansne lagti hai

mera ji chahta hai ki main us ko kha jaun

main us ko pure ka pura nigal jaana chahta hun

jab main us ki taraf baDhta hun

wo mujhe DanT kar bhaga deti hai

aur main dard se taDap uThta hun

aur main tanhai mein aa kar rota hun

aur main musalsal rota hi rahta hun

jab us se judai ka dard meri bardasht se bahar ho jata hai

main ek bar phir us ke pas jata hun

aur wo kahti hai: are tum kahan the?

muddat se dikhai nahin diye

aur ek bar phir

us ki adaon ka jadu mujh par chha jata hai

is ke jism ki kashish mujhe madhosh kar deti hai

main pagalon ki tarah use ghurne lagta hun

main apni aankhon se us ko chumta aur chaTta hun

main apni aankhon se us ko khata rahta hun

aur wo KHamoshi se sab kuchh dekhti rahti hai

jab main be-tab ho jata hun

to achanak wo ghusse mein aa jati hai

wo mujh se naraaz ho jati hai

aur main ek dhutkare hue kutte ki tarah

apni tanhai mein wapas aa jata hun

apni bebasi par aansu bahane ke liye

aur main musalsal rota hi rahta hun

mere KHayal mein wo aurat

duniya ki zalim-tarin aurat hai

aur main us aurat se mohabbat karta hun

main us ke andar gharq ho jaunga

(632) Peoples Rate This

Your Thoughts and Comments

Nazm In English By Famous Poet Zahid Dar. Nazm is written by Zahid Dar. Read famous Poem Nazm for youth and Student by Zahid Dar. Free Download Nazm in PDF.