Tu Apne Jaisa Achhuta KHayal De Mujhko

tu apne jaisa achhuta KHayal de mujh ko

main tera aks hun apna jamal de mujh ko

main TuT jaungi lekin na jhuk sakungi kabhi

majal hai kisi paikar mein Dhaal de mujh ko

main apne dil se miTaungi teri yaad magar

tu apne zehan se pahle nikal de mujh ko

main sang-e-koh ki manind hun na bikhrungi

na ho yaqin jo tujhe to uchhaal de mujh ko

KHushi KHushi baDhun kho jaun teri hasti mein

ana ke KHauf se 'sani' nikal de mujh ko