Typist

din Dhala jata hai Dhal jaega kho jaega

reg-aTi darz se dar aai hai ek zard kiran

dekh kar mez ko diwar ko almari ko

filon, kaghazon, bikhri hui tahriron ko

phir usi darz se ghabra ke nikal jaegi

aur bahar wo bhali dhup, sunahri kirnen

jo kabhi abr ke aaghosh mein chhup jati hain

kabhi peDon ke KHunuk sayon mein lahrai hain

pas hi peD pe hudhud ki khaTa-khaT khaT-khaT

aur niDhaal ungliyan kahti hain thaka-thak thak-thak

mahz abjad ki badalti hui be-his tartib

lafz hi lafz pe ehsas na arman koi

aur arman wo bhaTke hue rahi jin ke

sath sath aate hue bhut ki surat KHadshe

sard hathon se kabhi panw jakaD lete hain

aur kabhi aahani diwar uTha dete hain

main ne dekha hai kahin ghir ke jab aae baadal

chiKH uThe log ki ab khetiyan lahraengi

main ne dekhe hain tamannaon ke banjar anjam

kis tawaqqoa pe sanwarne lagi phir sochti sham

kis ki aankhon ki chamak rasta dikhlati hai

phir wahi qumquma-e-shab ki tarah KHanda-e-lab

kahe jata hai: chali aao, chali bhi aao

lekin is KHanda ke us par wahi pul ki talab

yun to main sirf tumhaara hun magar kya kije

baz majburiyan majburiyan! main jaanti hun

jaanti hun ki gae waqt ko kis ne roka

waqt aata hai guzar jata hai bas dur hi dur

ek din waqt baDe chain se so jaega

din Dhala jata hai Dhal jae ga kho jaega

(659) Peoples Rate This

Your Thoughts and Comments

Typist In English By Famous Poet Zia Jalandhari. Typist is written by Zia Jalandhari. Read famous Poem Typist for youth and Student by Zia Jalandhari. Free Download Typist in PDF.