Amir-e-shahr Ki Neki

purani baat hai

lekin ye anhoni si lagti hai

amir-e-shahr raaton ko

badal kar bhes

galiyon mein phira karta

wo diwaron pe likkhi

har nai tahrir ko paDhta

sarae mein har ek nau-warid-e-shab se

safar ka majra sunta

gharon ki chimniyon ko dekh kar

andaza-e-nan-e-jawin karta

pareshan-haaliyon se ba-KHabar rahta

mazaron maqbaron ki chaukhaTon ko chumta

aur shab gae masjid mein aata

subh tak

yaad-e-ilahi mein basar karta

hua ek raat yun

chaaron taraf dariya umaD aaya

koi jaga nahin

tanha

amir-e-shahr ke bazu

fasil-e-shahr ki buniyaad ko thame rahe shab bhar

badan ki Dhaal se

sailab ko roke rahe shab bhar

suna hai phir kabhi

dariya ki tughyani

fasil-e-shahr ko Dhane nahin aai

amir-e-shahr ki neki

zamane tak

KHata-karon ke kaam aai

(520) Peoples Rate This

Your Thoughts and Comments

Amir-e-shahr Ki Neki In English By Famous Poet Zubair Rizvi. Amir-e-shahr Ki Neki is written by Zubair Rizvi. Read famous Poem Amir-e-shahr Ki Neki for youth and Student by Zubair Rizvi. Free Download Amir-e-shahr Ki Neki in PDF.