Zanjir Se Junun Ki KHalish Kam Na Ho Saki

zanjir se junun ki KHalish kam na ho saki

bhaDki agar ye aanch to maddham na ho saki

badle bahaar-e-lala-o-gul ne hazar rang

lekin jamal-e-dost ka aalam na ho saki

kya kya ghubar uThae nazar ke fasad ne

insaniyat ki lau kabhi maddham na ho saki

hum lakh bad-maza hue jam-e-hayat se

jine ki pyas thi ki kabhi kam na ho saki

jo jhuk gai jabin tere naqsh-e-qadam ki samt

ta-zist phir wo aur kahin KHam na ho saki

mujh se na puchh apni hi tegh-e-ada se puchh

kyun teri chashm-e-lutf bhi marham na ho saki

kitne rumuz-e-shauq in aankhon mein rah gae

jin se nigah-e-dost bhi mahram na ho saki

mauj-e-nasim apni bahaaren luTa gai

lekin KHizan ki muda-dili kam na ho saki

allah-re ishtiyaq nigah-e-umid ka

khoe houn ki yaad mein pur-nam na ho saki

gul-kari-e-nazar ho ki rang-e-jamal-e-dost

kuchh baat thi ki zist jahannam na ho saki

in ki jabin pe KHair se ek rang aa gaya

meri wafa agarche musallam na ho saki

apne hi ghar ki KHair manai tamam umr

hum se 'surur' fikr-e-do-alam na ho saki

(641) Peoples Rate This

Your Thoughts and Comments

Zanjir Se Junun Ki KHalish Kam Na Ho Saki In English By Famous Poet Aal-e-Ahmad Suroor. Zanjir Se Junun Ki KHalish Kam Na Ho Saki is written by Aal-e-Ahmad Suroor. Read famous Poem Zanjir Se Junun Ki KHalish Kam Na Ho Saki for youth and Student by Aal-e-Ahmad Suroor. Free Download Zanjir Se Junun Ki KHalish Kam Na Ho Saki in PDF.