Manzil Pe Le Ke Pahunchega Azm-e-jawan Mujhe

manzil pe le ke pahunchega azm-e-jawan mujhe

kah do na sath le ke chale karwan mujhe

sunta hun phir chaman mein hui KHema-zan bahaar

aae na kyun qafas mein bhi yaad aashiyan mujhe

khoya hua hun un ke tasawwur mein is tarah

jaise sunae un ki koi dastan mujhe

ye jab bhi aai lai nawed-e-bahaar bhi

phir kyun bahaar se na ho pyari KHizan mujhe

main ho gaya hun kab se nasheman se be-niyaz

kah de koi Darae na barq-e-tapan mujhe

ek waqt tha chaman ke liye mar miTe the hum

rahne usi chaman mein na de baghban mujhe