Tilism-e-KHwab Se Mera Badan Patthar Nahin Hota

tilism-e-KHwab se mera badan patthar nahin hota

meri jab aankh khulti hai main bistar par nahin hota

yaqin aata nahin to mujh ko ya mahtab ko dekho

ki raat us ki bhi kaT jati hai jis ka ghar nahin hota

jidhar dekhun udhar hi dekhta rahta hun pahron tak

mujhe atraf ka KHali waraq azbar nahin hota

khajuren aur pani le ke aage baDhta jata hun

magar ye koh-e-imkan hai ki mujh se sar nahin hota

kam-az-kam mujh se duniya ko shikayat to nahin hogi

main is jaisa hi ban jaun agar behtar nahin hota

jawaz apna banata hun kisi nadida KHitte mein

jahan meri zarurat ho wahan aksar nahin hota

bahata hun kahin apne sifal-e-be-murkkab ko

main girye ke dinon mein chaak-e-duniya par nahin hota

gila to KHair kya hoga bas itna tum se kahna hai

tumhaari umr mein koi sitam-parwar nahin hota

to phir yun hai ki main ne us ko chaha hi nahin 'tabish'

agar us ki shabahat ka guman mujh par nahin hota

(1474) Peoples Rate This

Your Thoughts and Comments

Tilism-e-KHwab Se Mera Badan Patthar Nahin Hota In English By Famous Poet Abbas Tabish. Tilism-e-KHwab Se Mera Badan Patthar Nahin Hota is written by Abbas Tabish. Read famous Poem Tilism-e-KHwab Se Mera Badan Patthar Nahin Hota for youth and Student by Abbas Tabish. Free Download Tilism-e-KHwab Se Mera Badan Patthar Nahin Hota in PDF.