Dilbar Ye Wo Hai Jis Ne Dil Ko Dagha Diya Hai

dilbar ye wo hai jis ne dil ko dagha diya hai

ai chashm dekh tujh ko main ne sujha diya hai

tegh-e-sitam se mera jo KHun-baha diya hai

qatil ne mere dil ka ye KHun-baha diya hai

naqsh qadam gali ka teri bana diya hai

kyun kar uThun ki dil ne mujh ko biTha diya hai

ai chashm gar ye za hai rone ko tere zahmat

ro ro ke abr ko bhi tu ne rula diya hai

sar-rishta-e-wafa se kya shama-ru hain waqif

hum ne patang un se milna uDa diya hai

dil de ke jaan ka muft ek rog hi KHarida

daulat se teri main ne ye kuchh liya diya hai

jate nazar jidhar hi ek nur jalwa-gar hai

mukhDe se aaj parda kisi ne uTha diya hai

tu pan kha ke hansna ek sahal sa hai samjha

ye barq wo hai jis ne aalam jala diya hai

kyun hum se ho bigaDte hum ne to shaiKH sahab

holi se peshtar hi tum ko bana diya hai

kyun kar na mere dil ka shisha ho TukDe TukDe

nazron se is ko zalim tu ne gira diya hai

panw se kya jagaya tu ne hi mujh ko goya

Thokar se baKHt-e-KHufta mera jaga diya hai

kya jaanun ishq kya hai lekin kisi ne 'ehsan'

ek aag ka sa shoala dil ko laga diya hai