Tumhaari Jab Sin Aai Hain Sajan Dukhne Ko Lal Ankhiyan

tumhaari jab sin aai hain sajan dukhne ko lal ankhiyan

hui hain tab sin duni KHushnuma sahab-e-jamal ankhiyan

qayamat aan hai is waqt mein un par nazakat ki

dekho aai hain dikhne kis jhamak sin ye chhinal ankhiyan

aise kyun TuT aain josh sin pyare hararat ke

lagi thi garm ho kar is qadar ye kis ke nal ankhiyan

ilaj un ka hai pyare aashiqon ke sang ki haldi

rangen is mein kaho kapDa karen apna rumal ankhiyan

mera dil poTli ki tarah un par le ke Tuk phero

mujarrab ToTka hai is mein aa jaangi bahaal ankhiyan

zarar hai tund ho kar dekhna bimar kun pyare

Tuk ek parhez kar aashiq pe do din mat nikal ankhiyan

mera dukhta hai ji ye anmanahaT dekh kar un ka

ubalta hai bahut jab dekhta hun main malal ankhiyan

nazar badta hun apni jaan-o-ji ko main karun sadqe

agar dewen mujhe apni shifa hone ki fal ankhiyan

saza hai un ke tain ye dard thoDa sa ki karti thin

hamesha chashm-poshi 'abru' ka dekh haal ankhiyan