Nahin Koi KHabar Karna Nahin Hai

nahin koi KHabar karna nahin hai

hamein kuchh bhi asar karna nahin hai

bahut hi KHubsurat zindagi hai

magar aasan basar karna nahin hai

hawa ko rasta gar mil bhi jae

charaghon par asar karna nahin hai

gharaunde hi mein apne lauT jaun

ki KHud ko dar-ba-dar karna nahin hai

hazaron raste to muntazir hain

taKHayyul mein safar karna nahin hai

lubhate hain nae paude hamein bhi

magar sab ko shajar karna nahin hai

hain ab bhi ishq ki baaten gawara

lahu dil ko magar karna nahin hai

agar hai zindagi se pyar 'adil'

muhim koi bhi sar karna nahin hai