Aai Thi Us Taraf Jo Hawa Kaun Le Gaya
aai thi us taraf jo hawa kaun le gaya
KHali paDa hai taq diya kaun le gaya
is shahr mein to koi sulaiman bhi nahin
main kya bataun taKHt-e-saba kaun le gaya
dushman aqab mein aa bhi gaya aur abhi talak
tum ko KHabar nahin hai asa kaun le gaya
apne badan se lipTa hua aadmi tha main
mujh se chhuDa ke mujh ko bata kaun le gaya
'gauhar' ye majra to parindon se puchhna
peDon ko kya pata hai hawa kaun le gaya
Afzal Gauhar Rao 
(647) Peoples Rate This