Kyun Na Hum Ahd-e-rifaqat Ko Bhulane Lag Jaen
kyun na hum ahd-e-rifaqat ko bhulane lag jaen
shayad is zaKHm ko bharne mein zamane lag jaen
nahin aisa bhi ki ek umr ki qurbat ke nashe
ek do roz ki ranjish se Thikane lag jaen
yahi naseh jo hamein tujh se na milne ko kahen
tujh ko dekhen to tujhe dekhne aane lag jaen
hum ki hain lazzat-e-azar ke mare hue log
chaaragar aaen to zaKHmon ko chhupane lag jaen
rabt ke sainkaDon hile hain mohabbat na sahi
hum tere sath kisi aur bahane lag jaen
saqiya masjid o maktab to nahin mai-KHana
dekhna phir bhi ghalat log na aane lag jaen
qurb achchha hai magar itni bhi shiddat se na mil
ye na ho tujh ko mere rog purane lag jaen
ab 'faraaz' aao chalen apne qabile ki taraf
shairi tark karen bojh uThane lag jaen
Ahmad Faraz 
(3122) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544