Ab Wo Galiyan Wo Makan Yaad Nahin
ab wo galiyan wo makan yaad nahin
kaun rahta tha kahan yaad nahin
jalwa-e-husn-e-azal the wo dayar
jin ke ab nam-o-nishan yaad nahin
koi ujla sa bhala sa ghar tha
kis ko dekha tha wahan yaad nahin
yaad hai zina-e-pechan us ka
dar-o-diwar-e-makan yaad nahin
yaad hai zamzama-e-saz-e-bahaar
shor-e-awaz-e-KHizan yaad nahin
Ahmad Mushtaq 
(795) Peoples Rate This