Mil Hi Jaega Kabhi Dil Ko Yaqin Rahta Hai
mil hi jaega kabhi dil ko yaqin rahta hai
wo isi shahr ki galiyon mein kahin rahta hai
jis ki sanson se mahakte the dar-o-baam tere
ai makan bol kahan ab wo makin rahta hai
ek zamana tha ki sab ek jagah rahte the
aur ab koi kahin koi kahin rahta hai
roz milne pe bhi lagta tha ki jug bit gae
ishq mein waqt ka ehsas nahin rahta hai
dil fasurda to hua dekh ke us ko lekin
umr bhar kaun jawan kaun hasin rahta hai
Ahmad Mushtaq 
(1329) Peoples Rate This