Shabnam Ko Ret Phul Ko KanTa Bana Diya
shabnam ko ret phul ko kanTa bana diya
hum ne to apne bagh ko sahra bana diya
is unch nich par to Thaharte nahin the panw
kis dast-e-shauq ne ise duniya bana diya
kin muTThiyon ne bij bikhere zamin par
kin barishon ne is ko tamasha bana diya
sairab kar diya teri mauj-e-KHiram ne
rakkha jahan qadam wahan dariya bana diya
ek raat chandni mere bistar pe aai thi
main ne tarash kar tera chehra bana diya
puchhe agar koi to use kya bataon main
dil kya tha, tere gham ne ise kya bana diya
Ahmad Mushtaq 
(1064) Peoples Rate This