TuT Gaya Hawa Ka Zor Sail-e-bala Utar Gaya
TuT gaya hawa ka zor sail-e-bala utar gaya
sang-o-kuluKH rah gae lahar gai bhanwar gaya
wo bhi ajib daur tha dil ka chalan hi aur tha
sham hui to ji uTha subh hui to mar gaya
kis ke bandhe hue the hum daman-e-mahtab se
hum bhi udhar udhar gae chand jidhar jidhar gaya
kitne rafiq-o-ham-safar jin ki mili na kuchh KHabar
kis ke qadam uThe kidhar kaun kahan pasar gaya
bujh gai raunaq-e-badan uD gaya rang-e-pairahan
jaan umid-war-e-man waqt bahut guzar gaya
Ahmad Mushtaq 
(826) Peoples Rate This