Udas Kar Ke Dariche Nae Makanon Ke
udas kar ke dariche nae makanon ke
sitare Dub gae sabz aasmanon ke
gai wo shab jo kabhi KHatm hi na hoti thi
hawaen le gain auraq dastanon ke
har aan barq chamakti hai dil dhaDakta hai
meri qamis pe tinke hain aashiyanon ke
tere sukut se wo raaz bhi hue ifsha
ki jin ko kan taraste the raaz-danon ke
ye baat to jaras-e-shauq ko bhi hai malum
qadam uThen ge to bas tere na-tawanon ke
Ahmad Mushtaq 
(921) Peoples Rate This