Jidhar Se Wadi-e-hairat Mein Hum Guzarte Hain

jidhar se wadi-e-hairat mein hum guzarte hain

udhar to ahl-e-tamanna bhi kam guzarte hain

tere huzur jo anfas-e-gham guzarte hain

ajab hayat ke aalam se hum guzarte hain

rawan hai barq ka shoala sahab-e-rahmat mein

naqab Dal ke ahl-e-sitam guzarte hain

hayat rok rahi hai koi qadam na baDhae

ki aaj manzil-e-hasti se hum guzarte hain

lalak baDha ke faqat chand bund barsa ke

rawan-dawan se sahab-e-karam guzarte hain

tajjub un ke liye marg-e-na-gahani ka

jo zindagi ke marahil se kam guzarte hain

muKHalifat hai khuli ab na dosti 'ahsan'

ghuTi ghuTi si fazaon se hum guzarte hain