Main Hans Raha Tha Garche Mere Dil Mein Dard Tha

main hans raha tha garche mere dil mein dard tha

ye raaz khul gaya to mera chehra zard tha

achchha hua ki aap ne daman jhaTak diya

mera wajud aap ke daman pe gard tha

KHud apni zat ke na kisi kaam aa sake

wo log jin ke dil mein zamane ka dard tha

kitne uruj par thi meri shiddat-e-talab

tum mil gae to shauq ka har jazba sard tha

tanhaiyon mein jis ke bane raazdar tum

goya wo main na tha koi aawara-gard tha