Mutrib-e-dil Ki Wo Tanen Kya Huin
mutrib-e-dil ki wo tanen kya huin
wo taKHayyul ki uDanen kya huin
kya hue wo tirchhi nazron ke KHadang
abruon ki wo kamanen kya huin
wo adaen jin pe hoti thin nisar
chahne walon ki jaanen kya huin
kya hue TuTe dilon ke zamzame
be-zabanon ki zabanen kya huin
kya hue 'aKHtar' umidon ke hisar
wo azaem ki chaTanen kya huin
Akhtar Ansari 
(619) Peoples Rate This