Aankh Dariya Jigar Lahu Karna

aankh dariya jigar lahu karna

kitna mushkil hai aarzu karna

tajziya dil-nashin KHayalon ka

hai ghazalon ki justuju karna

tazkira in ki dil-nawazi ka

aur phir mere ru-ba-ru karna

bas yahi ek shaghl-e-tanhai

rah gaya KHud se guftugu karna

kushtagan-e-alam se sikha hai

dard-mandon ki aabru karna

doston ke karam se chhoD diya

hum ne andesha-e-adu karna

bachna har nok-e-KHar se 'aKHtar'

zaKHm phulon ke bhi rafu karna