Waqt-e-aKHir Jo Baalin Par Aajaiyo
waqt-e-aKHir jo baalin par aajaiyo
yaad rakhiyo bahut nekiyan paiyo
mere laeq jo ho mujh ko batlaiyo
jaan hazir hai kuchh aur farmaiyo
ek Dar mujh ko arz-e-tamanna mein hai
tum pasine pasine na ho jaiyo
hum dua amn ki mangte hain magar
aap bhi apni pael ko samjhaiyo
hum ko bhi kuchh lakiron ki pahchan hai
aap apni hatheli idhar laiyo
haal-e-dil hum sunate hain hanste ho tum
hum nahin bolte tum se ab jaiyo
mir ke rang mein likh ke ghazlen 'alim'
dhire dhire na tum mir ban jaiyo
Aleem Usmani 
(813) Peoples Rate This