Bachche Ki Dua
lab pe aati hai dua ban ke tamanna meri
zindagi shama ki surat ho KHudaya meri!
dur duniya ka mere dam se andhera ho jae!
har jagah mere chamakne se ujala ho jae!
ho mere dam se yunhi mere watan ki zinat
jis tarah phul se hoti hai chaman ki zinat
zindagi ho meri parwane ki surat ya-rab
ilm ki shama se ho mujh ko mohabbat ya-rab
ho mera kaam gharibon ki himayat karna
dard-mandon se zaifon se mohabbat karna
mere allah! burai se bachana mujh ko
nek jo rah ho us rah pe chalana mujh ko
Allama Iqbal 
(9252) Peoples Rate This