Koi Diwar Na Dar Baqi Hai

koi diwar na dar baqi hai

dasht-e-KHun hadd-e-nazar baqi hai

sab marahil se guzar aaya hun

ek teri rahguzar baqi hai

subh raushan hai chhaton ke upar

raat palkon pe magar baqi hai

KHwahishen qatl hui jati hain

ek mera dida-e-tar baqi hai

kaun deta hai sadaen mujh ko

kis ke honTon ka asar baqi hai

kaT gai shaKH-e-tamanna 'amabar'

na-umidi ka shajar baqi hai