Wada-e-wasl Aur Wo Kuchh Baat Hai

wada-e-wasl aur wo kuchh baat hai

ho na ho is mein bhi koi ghat hai

KHalq nahaq darpai-e-isbaat hai

hai dahan us ka kahan ek baat hai

bosa-e-chah-e-zanKHdan ghair len

Dub marne ki ye ai dil baat hai

ghar se nikle ho nihatte waqt-e-qatl

ye bhi bahr-e-qatl-e-ashiq ghat hai

main ne itna hi kaha banwao KHat

ye bigaDne ki bhala kya baat hai

baad muddat baKHt jage hain mere

baiThe hain sone ko sari raat hai

kya karun wasf-e-butan-e-KHud-pasand

in se baDh kar bas KHuda ki zat hai

baaton baaton mein jo main kuchh kah gaya

hans ke farmane lage kya baat hai

harf-e-matlab saf kah sakta nahin

hai adab mane ki pahli raat hai

mujh se ho izhaar-e-ulfat wah-wa

aap ke farmane ki ye baat hai

ro rahe hain hum mila de lab se lab

mai-kashi ho saqiya barsat hai

zach hai teri chaal se raftar-e-charKH

mohr-e-ruKH se bazi-e-mah mat hai

kaisi kaTti hai siyah-baKHti mein umr

raat se din din se bad-tar raat hai

chheDta hai dil ko kya ai dard-e-hijr

KHud giraftar-e-hazar-afat hai

ai ghani de sim-o-zar waqt-e-bala

mal-e-duniya jaan ki KHairaat hai

gar jagah dil mein nahin phir is se kya

ye doshambe ki ye budh ki raat hai

saf kah de tu yahan aaya na kar

yar ye sau baat ki ek baat hai

laKHt-e-dil hain mere khane ko 'amir'

bas inhin TukDon pe ab auqat hai