Na To Be-karani-e-dil Rahi Na To Madd-o-jazr-e-talab Raha

na to be-karani-e-dil rahi na to madd-o-jazr-e-talab raha

tere baad bahr-e-KHayal mein na KHarosh uTha na ghazab raha

mere samne se guzar gaya wo ghazal dasht-e-murad ka

main khaDa raha yunhi be-sada mujhe pas-e-had-e-adab raha

use jaan-guzaron se kya shaghaf use KHaksaron se kya sharaf

wo fazilaton ke dayar mein ba-huzur pa-e-nasab raha

wahi baiat-e-gham-e-hijr thi wahi kashf-e-hujra-e-wasl tha

main murid-e-halqa-e-KHwab tha so qarin-e-murshid-e-lab raha

teri mamlikat ke nisab par koi tabsira bhi kare to kya

wahi raushni ka safir hai jo asir-e-zulmat-e-shab raha