Fishaar-e-tirah-shabi Se Sahar Nikal Aae

fishaar-e-tirah-shabi se sahar nikal aae

siyah ret pe koi shajar nikal aae

main apni zat ki diwar par hun mahw-e-qalam

bhale hi surat-e-mehrab-o-dar nikal aae

shikasta KHwab ke reze zamin-e-wahshat se

barahnagi ki qaba oDh kar nikal aae

mere guman ke dipak na jal sake shab-bhar

pas-e-yaqin jo jale beshtar nikal aae

nigah-e-shisha-e-hasrat mein qaid ho jate

ye aur baat ki hum waqt par nikal aae

main sang-e-yas pe tahrir kar raha tha kuchh

ki lafz chand baDe mo'atabar nikal aae

siyah raat ki taswir par shikan se abhi

ajab nahin hai ki 'amir' nazar nikal aae