Hamare Chehron Mein Pinhan Hain Zawiye Kya Kya

hamare chehron mein pinhan hain zawiye kya kya

dabi zaban mein kahte hain aaine kya kya

jabin-e-KHak tujhe main ne KHun se sincha tha

magar ye tu ne dikhae hain daere kya kya

hamare sar ki bulandi pe waqt hairan hai

chakhe hain nok-e-sinan ne bhi zaiqe kya kya

taDap ke ruh zamin-bos ho gai warna

badan-chaTan pe uThte the zalzale kya kya

KHirad qarar jo pae to hum bhi dekhenge

hain intishaar ke daman mein masale kya kya

tera KHayal kisi saeban se kam bhi nahin

lagate rah gae suraj bhi qahqahe kya kya

shikasta KHwabon ke jab aasman khulte hain

bikharte naqsh bhi dete hain hausle kya kya

abhi bhi ghar ke larazte hue charaghon se

hawa-e-shab ne lagae hain aasare kya kya

tapish mein TuT ke patte bikhar gae 'amir'

nazar ke panw mein uThte hain aable kya kya