Hum Ki Sarmaya-e-iqan Liye BaiThe Hain

hum ki sarmaya-e-iqan liye baiThe hain

azmat-e-KHak teri shan liye baiThe hain

kitne be-rang fasilon ko qabaen denge

sab ke sab tangi-e-daman liye baiThe hain

meri shah-rag ka lahu lakh mushahid Thahre

sahib-e-shahr to farman liye baiThe hain

shauq mein surat-e-takmil-e-hunar ki KHatir

hum bhi aaina-e-imkan liye baiThe hain

phir dar-o-baam pe qindil saje bhi to kya

zau-shikan raat ka saman liye baiThe hain

ab bhi ummid-e-kaf-e-pa-e-talab raushan hai

zindagi hum tera ehsan liye baiThe hain

tera chehra kabhi utra nahin dekha 'amir'

aaine aaj bhi arman liye baiThe hain